धर्म र सम्प्रदायबीच मेलमिलाप र भाइचारामा वृद्धि गरौँ : प्रधानमन्त्री

काठमाडौं, १ मंसिर । प्रधानमन्त्री केपी ओलीले हरेक जात, धर्म, वर्ण, क्षेत्र र सम्प्रदायका नेपालीलाई एकताको सूत्रमा उनेर प्रगतिको बाटामा अगाडि बढाउन छठ पर्वबाट प्रेरणा मिलोस् भन्ने कामना गर्नुभएको छ ।छठ पर्वको अवसरमा आज समस्त देशवासी दाजुभाइ तथा दिदीबहिनीमा सुस्वास्थ्य, दीर्घायु र उत्तरोत्तर प्रगतिको कामना गर्दै ओलीले सबैमा भाइचारा, एकता र आत्मीयताका लागि शुभकामना व्यक्त गर्नुभएको छ ।

प्रधानमन्त्री ओलीले सन्देशमा भन्नुभएको छ, ‘धार्मिक सहिष्णुता, सामाजिक एकता र परस्परमा दिगो सम्बन्ध नेपालको परम्परादेखिको मौलिक संस्कृति हो, नेपाल बहुधार्मिक, बहुसांस्कृतिक र बहुजातीय जनताको साझा थलो हो, विभिन्न जातजाति र समुदायले मनाउने पर्वका आआफ्ना मौलिक विशेषता छ र सबै पर्व हाम्रा अमूल्य सांस्कृतिक पहिचान र गहना हुन्, विभिन्न समुदाय र जातजातिको पर्व नै नेपालीको समुच्च साँस्कृतिक पहिचान हो ।

नदी किनारमा बसेर सूर्याेपासना गर्ने, शरीर शुद्ध गर्ने, नयाँ अन्नद्वारा बनाइएका चोखो र मीठो परिकार खाने संस्कृतिका रुपमा मुख्य रुपमा तराई–मधेसमा मनाइने छठ पर्व पहाडमा पनि विस्तार भएको तथा एउटा समुदायले मनाउने परम्परालाई अर्काे समुदायले पनि आत्मसात् गर्ने र मनाउने फराकिलो साँस्कृतिक विकासले विभिन्न जात, धर्म र सम्प्रदायबीच आपसी मेलमिलाप र भाइचारामा वृद्धि गरेको प्रधानमन्त्रीको सन्देशमा उल्लेख छ ।

Labels: News, Politics