रियाल मड्रिड र म्यान्चेस्टर सिटी प्रि क्वाटरफाईनलमा प्रवेश

काठमाडौं, कार्तिक १८ । युरोपियन च्याम्पियन्स लिग फुटबल प्रतियोगिता अन्तर्गत मंगलबार रातिका खेलहरुमा विजयी हुँदै रियाल मड्रिड र म्यान्चेस्टर सिटी प्रि क्वाटरफाईनलमा प्रवेश गरेका छन् ।मंगलबार रातिको खेलमा फ्रान्सको पेरिस सेन्ट जर्मेन पि.एस.जी.लाई १-० ले हराएपछि स्पेनको रियाल मड्रिड समुह ए मा दुई खेल खेल्न बाँकी छँदै अर्को चरणमा उक्लिएको हो ।खेलमा रियाल मड्रिडलाई विजयी गराउन नाचो फर्नान्डेजले निर्णायक गोल गरे । जितपछि रियाल मड्रिडले समुहमा ४ खेलबाट १० अंक जोडेको छ । दोस्रो स्थानको पिएसजीको ७ अंक छ । 

यही समुहको अर्को खेलमा मंगलबार राति स्विडेनको माल्मोले युक्रेनको शख्तरलाई १-० ले हरायो । उता समुह डी को खेलमा सेभियालाई ३-१ ले हराँउदै म्यान्चेस्टर सिटी पनि राउण्ड अफ सिक्सटिनमा प्रवेश गरेको छ । खेलमा सिटीलाई विजयी गराउन राहिम स्टर्लीङ, फर्नान्डीनो र विल्फ्रेड बोनीले एक एक गोल गरे । यो समुहको अर्को खेलमा ईटालीको युभेन्टस र जर्मनीको बोरुसीया मोन्चेनले १-१ गोलको बराबरी खेलेका छन् । यसैगरी समुह बी को खेलमा इंग्लण्डको म्यान्चेस्टर युनाईटेडले रुसको सि.एस.के.ए मस्कोलाई १-० ले हरायो । खेलमा म्यान्चेस्टर युनाईटेडलाई विजयी गराउन वायन रुनीले निर्णायक गोल गरे । 

जितसँगै म्यानचेस्टर युनाईटेड समुहको शिर्ष स्थानमा उक्लिएको छ । यही समुहको अर्को खेलमा नेदरल्याण्ड्सको पि.एस.भी.ले जर्मनीको उल्फवर्गलाई २-० ले पराजित गर्‍यो । च्याम्पियन्स लिग अन्तर्गत समुह सि का खेलहरुमा पोर्चुगलको बेनीफीकाले टर्कीको गालातासारेलाई २-१ ले हराँउदा स्पेनको एथ्लेटिको मड्रिड र काजखस्तानको एस्टानाले गोलरहित बराबरी खेलेका छन् । च्याम्पियन्स लिग फुटबलमा आज राती समुह ई देखि एच सम्मका आठ खेल हुनेछन् । संकटग्रस्त क्लव चेल्सीले युक्रेनको डाईनामो किभसँग खेल्दा अर्को इंग्लीश क्लव आर्सनलले जर्मनीको बायर्न म्युनिखसँग उसैको मैदानमा खेल्नेछ ।

Labels: Sports